تقلص الرقبة (التورتيكولي) فمراكش: كيفاش تبرا بسرعة
كتفيق الصباح ومابقيتيش تقدر تحرك راسك، كل حركة كتوجع. هاد الشي كيخلع ولكن مخصكش تقلق: التورتيكولي فغالب الأحيان كيتعالج مزيان وبسرعة ملي كتمشي عند المختصين.
علاش الرقبة كتبلوكي هكا؟
التورتيكولي غالبا كيجي من تشنج فعضلات الرقبة. الأسباب كتكون بزاف: نعست على وضعية خايبة، تعرضتي لريح بارد، ولا عندك ستريس متراكم وجسمك قال ستوب. حتى حركة غالطة واحدة تقدر تسببها.
عند الأطفال الصغار والرضع، التورتيكولي يقدر يكون من الولادة ولا من الوضعية، وفهاد الحالة خاص يبدا الترويض بكري باش النتائج تكون سريعة.
شنو كندير ليك فالعيادة
- العلاج اليدوي: حركات خفيفة ودقيقة على فقرات الرقبة باش نحلو البلوكاج.
- المساج العلاجي: خدمة على العضلات المتشنجة فالرقبة وأعلى الظهر.
- السخانة والأجهزة: باش العضلة ترتخي من الداخل.
- نصائح عملية: كنوريك كيفاش تنعس وكيفاش تجلس باش ما ترجعش ليك المشكلة.
عادة من 1 حتى 3 حصص وكترجع الرقبة عادية. إلا كانت المشكلة كتعاود، الدكتور فارس كيقلب على السبب الحقيقي.
أسئلة شائعة
واش التورتيكولي يقدر يطول بزاف؟
التورتيكولي العادي كيتحل من 2 حتى 5 يام بالعلاج المناسب. إلا بقا كتر من سيمانة خاص تستشير حيت يقدر يكون السبب شي حاجة أخرى.
واش ولدي الصغير عندو تورتيكولي، خطير؟
التورتيكولي عند الرضع شي حاجة معروفة وكتتعالج مزيان بالترويض. كلما بكرتي كلما النتيجة حسن.